بصراحة ماكنت عرفان عن شو رح احكي اليوم
وقلت خلينا نشوف شو رح يطلع معنا بعد صلاة الجمعة
هون رحت عالمسجد وصليت من فضل ربي وبعد الصلاة قلت لوين بدي روح
مافي لا شغل ولا غيره خلني ظل بالمسجد اتعبد لبين ما اصلي العصر بالمرة
وفعلاً جبت كتاب الله وبلشت قراءة فيه لوقت منيح
تعبت شوي قلت خلني ارتاح واتفرج شوي عالمصلين وعالناس يلي طالعة نازلة
هون يا رعاكم الله ربكن بعتلي موضوع اليوم بهالقعدة رح قلكن جملة معينة رح بلش من بعدها
بسمس حمسفس فسمس حبسبس
اكيد مافهمتوا شو القصد ماهيك ؟
بتعرفوا شو التفسير لهالجملة ؟
هي الأفيكتات والأصوات البلبلية ومخارج الألفاظ يلي بتصدر من شفايف بعض المسلمين
وهن عم يصلوا ركعتين بسرعة الضوء تقريبا
يعني مافهمت مين يلي فهم هالبشر انه وقت يصلوا في حدا لاحقهن بعصا المكنسة
أو بالنشافة
أستغفرك ياربي بتحسوا انه الواحد منهن عم يلعب تمارين سويدي مو عم يصلي
لك مابيلحق يقول الله أكبر الا وبيكون زمط لتحت وصار يطج ويركع
يطج ويركع وحسمس وفحمس واوب بقدرة قادر بعد عشر ثواني
بتسمعوا بيقول السلام عليكم ورحمة الله تعالى وبركاته
بصراحة وانا عم بتفرج على نوعية هالبشر حسيت حالي قاعد عالمونتاج
أو على شي جهاز فيديو وعامل فاست موشن للقطة أو سيرش بسرعة البرق
لك يا جماعة هي اسمها صلاة صلاااااااااة يعني بدها شوية رويَّة شوية هدوء
بدها شوية طهارة للفكر شوية تركيز شوية تقوى
بعرف ممكن يجي حدا ويقول انه ربي يلي بيحاسب والأجر والثواب من عنده
بس انا مجرد عم انصح مجرد عم امتعض من هالشي
انا ماعم بطلب من هالفئة انه تكونوا خاشعين لدرجة انه يقطعولكن دياتكن ورجليكن
لاسمح الله بدون ماتحسوا عليهن من شدة الخشوع لا طبعا مو هيك
بس كمان هدوا شوي يا قوم
عطوا الملائكة فرصة صغيرة لتفهم شو عم تقولوا عالاقل
يخرب بيتكن حتى وانتوا بتصلوا دودودودودو
شو عم تبلعوا الحكي بلع طب شو في وراكن مثلا بدك تروح تتغدى
اكيد مافي لا غدا ولا قهوة ولا سيجارة
معناته اننهف وانقبر على قامتك وانعدل خمس دقايق صلي فيهن متل الخلق
والأحلى من كل هالحكي بعد ما صليت العصر جيت طالع
لقيت واحد فايت متأخر بده يصلي العصر وعم يتوضا
ما اختلفنا وماعندي اي مشكلة مع هيك شي بلكي الزلمة كان عنده شغله اخرته
بس المو طبيعي واللي جابلي شلل اطفال على كبر
انه هالاخ جايب معه قنينة مي متلجة عم يتوضا فيها
قلت بلكي الزلمة حران وسخنان من هالشوب
بس ركزت شوي معه لقيته تمضمض شي تلاتين مرة مو تلات مرات
اي اتركوووونا بقى يعني اشرب مي وافطر وبلاه هالعلاك هههههههههههههه
